أسوأ 7 مواقف في علاقة روس ورايتشل من مسلسل فريندز

في الموضوع ده جمعنا أسوأ مواقف جمعت الـCouple ده

Share your love

علاقة روس ورايتشل في مسلسل فريندز واحدة من أهم العلاقات الأساسية طوال الـ10 مواسم اللي قدمهم المسلسل، علاقة صعبة ومعقدة ومليانة مشاكل واختلافات لكنها برضه قوية وفيها لحظات كتير ملهمة في نفس الوقت، تخليك مش عارف تكرهها بشكل كامل رغم كل اللي عملوه في بعض. روس بيحب رايتشل من وهو عنده 14 سنة تقريبًا وفضل يحبها طول الوقت حتى لما كان بيدخل في علاقات تانية ماكنش بيعرف ينساها، بس في نفس الوقت وهما سوا ماكنش بيعترف بغلطه وكتير كان بيقلل منها. وعلى الناحية التانية رايتشل كانت أنانية في مواقف كتير جدًا وده ممكن علشان كانت متأكدة إن محدش هيحبها زي روس رغم إنه مايديهاش الحق تفسد حياته!.. في الموضوع ده جمعنا أسوأ مواقف جمعت الـCouple ده

علاقة روس ورايتشل في مسلسل فريندز

7-قائمة العيوب والمميزات (الموسم 2، حلقة 8)

حاجات كتير في حياتنا بتمشي بموازنة ما بين الإيجابيات والسلبيات، لكن صعب جدًا لما تلاقي الشخص اللي أنت معجب بيه بيقارن بينك وبين حد تاني، وده اللي حصل مع رايتشل وقت ما اكتشفت إن روس عمل مقارنة بينها وبين جولي بإيجابيات وسلبيات كل واحدة وقد إيه بالنسباله كانت رايتشل تافهة أحيانًا وثقتها في نفسها ضعيفة وبتشتغل جرسونة.. المقارنات في العلاقة العاطفية خصوصًا شيء سيء حتى لو كان روس قال عن جولي إنها رغم كل مميزاتها “مش رايتشل”.

اقرئي أيضًا: 7 دروس يمكننا تعلمها من علاقة مونيكا وتشاندلر في مسلسل فريندز

6-النصائح السلبية (الموسم 2، الحلقة 4) (الموسم 3، الحلقة 25)

بعد سنين طويلة رايتشل اكتشفت إن روس بيحبها لكنه ماكنش عارف يلفت نظرها أو يقولها، ولما حبت تدخل معاه في علاقة كان هو بالفعل مرتبط بجولي وبيحاول يتعامل مع رايتشل كصديقة ولأنه بيثق فيها طلب منها تساعده في علاقته الجديدة، وبدل ما تكون صديقة مخلصة وتفضل سعادته على أي شيء تاني، قررت تقوله نصايح غلط تمامًا في محاولة منها علشان تفسد العلاقة.

مرة تانية بعد انفصالهم، ودخول روس في علاقة جديدة مع بوني صديقة فيبي، رايتشل بتلاقيها ذكية ومرحة وروس بدأ يتعلق بيها، فبتقرر تقولها إن روس هيحبها أكتر لو حلقت شعرها تمامًا، وبوني بتسمع نصيحتها للأسف.

5-مسح رسالة إيميلي (موسم 5، حلقة 20)

بعد اللي حصل في فرح روس وإيميلي والعلاقة اللي اتدمرت، رايتشل بتكون في بيت روس وفي نفس الوقت بتوصل رسالة مسجلة على التليفون من إيميلي بتقول فيها إن فرحها بكرة لكنها مستعدة تكلمه ويحاولوا يرجعوا العلاقة ويكون فيه فرصة تانية، لكن رايتشل بتحاول تكون صديقة كويسة وبتفكر إن الأحسن إن روس مايسمعش الكلام ده ويكمل في طريقه  فبتمسح الرسالة.. بس حتى لو كانت نيتها إنها عايزة تساعده فمش من حقها تتصرف في حاجة تخصه هو وبس.

اقرئي أيضًا: علامات تقول أن الكراش معجب بكِ

4-الغيرة من شغلها (موسم 3، حلقة 15)

كلنا فاكرين جدل روس ورايتشل “We were on a break” لكن كان إيه السبب في إنهم يوصلوا لمرحلة البريك أو الاستراحة من العلاقة؟ روس كان غيور بشكل غير طبيعي على رايتشل في شغلها الجديد، كان حاسس بالقلق المستمر من وجود مارك اللي وظفها رايتشل، والغيرة والخوف خلوا روس يتصرف بشكل سيء ويضغط عليها ويقلل من أهمية شغلها كله من الأساس ويسخر منه، علشان كده رايتشل طلبت إنهم ياخدوا بريك من بعض خصوصًا لما روس ما حاولش يعتذر عن اللي عمله أو شاف نفسه غلطان. صحيح كان عايز يشوفها ويحتفل معاها بس ماقدرش انشغالها ولا أهمية شغلها بالنسبالها.

3-الكذب إنهم مابقوش متجوزين (موسم 6، حلقة 4)

علاقة الثنائي ده بيحكمها الأفعال المتهورة طول الوقت من الطرفين، وهما في لاس فيجاس سكروا واتجوزوا ولما فاقوا اتفقوا إنهم لازم يفسخوا عقد الجواز ده في أسرع وقت، ورس طمنها إنه هيعمل كده، لكنه ماعملش علشان ماحبش يبقى طلق 3 مرات، وبدل ما يتكلم مع رايتشل أوهمها إنه تولى الإجراءات وخلصها رغم إنها كانت مراته لسه قانونًا، وطبعًا لما اكتشفت راحتله في وسط المحاضرة وقدامه طلابه واتخانقت معاه، لأ أكيد محدش يحب يكتشف فجأة إنه متجوز وهو مايعرفش.

اقرئي أيضًا: 8 دروس في العلاقات ألهمتنا بها افلام هاري بوتر

2-إصرارها على حضور فرح روس (موسم 4، حلقة 23 و24)

لما روس وإيميلي قرروا يتجوزوا، كان باين قد إيه روس سعيد وأخيرًا بدأ يتجاوز علاقته برايتشل اللي بتختار ماتروحش الفرح في لندن علشان مايكونش الوضع محرج لأنهم بينهم تاريخ مشترك، بس في آخر لحظة بتقرر تسافر لندن علشان تقول لروس إنها لسه بتحبه، ده كان قرار أناني جدًا وتوقيته سيء ورايتشل ماسمعتش كلام فيبي ولا حتى كلام الشخص اللي كان جنبها على الطيارة، وكان مصرة تروح وتقول حتى لو هتفسد لحظة مهمة في حياته وتبوظ كل حاجة خططلها. صحيح لما شافته مبسوط ماتكلمتش مع روس في حاجة، لكنها اتسببت فيه إنه يقول اسمها بالغلط بدل من اسم إيميلي وكل حاجة تنهار بعدها.

1-الفرق بين Break وBreak up (موسم 3، الحلقة 16)

تكملة للموقف رقم 4، رايتشل مالقتش من روس أي دعم ولا حتى اعتذار وتفهم، فطلبت منه انهم ياخدوا بريك، يفكروا أكتر، لكن روس اعتبر الاستراحة من العلاقة = انفصال حتى لو مؤقت وفي نفس اليوم قابل بنت في محل الطباعة وخان رايتشل معاها، بالسهولة دي، والمشكلة الأكبر إنه فضل في كل مرة رايتشل بتحاول تطلب منه الاعتذار وإنها ممكن تتخطى اللي حصل لو بس تحمل المسئولية وعرف إنه غلط، كان بيرفض تمامًا بحجة إنهم كانوا في بريك، فعادي بالنسبة له إنه يكون على علاقة بواحدة تانية في نفس اليوم اللي المفروض إنهم بيبعدوا عن بعض مؤقتًا علشان يفكروا في علاقتهم!

وزي ما قولنا في البداية، العلاقة ما بين روس ورايتشل كانت دايمًا معقدة ومليانة أخطاء وأنانية وعدم اعتراف بالغلط، وكل طرف كان عايز يتحب بالطريقة اللي تناسبه هو وبس، وفي نفس الوقت كان فيها لحظات دعم وسعادة وحب.. بالنسبالكم إيه أفضل وأسوأ اللحظات في علاقة روس ورايتشل؟ شاركونا في التعليقات.

اقرئي أيضًا:

ليه البنات بتفضل البادي بوي عن الجود بوي.. اعرفي الأسباب

أفضل المجاملات التي تحب النساء سماعها وكذلك أسوأها

10 علامات تخبرك أنه لا يحبك بل يريد امتلاكك

Source: E7kky.com
شارك

اترك ردّاً

لن يتم نشر عنوان بريدك الإلكتروني. الحقول الإلزامية مشار إليها بـ *

Stay informed and not overwhelmed, subscribe now!