ازاي تفركشوا بشياكة؟ دليلك لإنهاء العلاقة بأناقة

المحتوى

طريقة الانفصال عن الحبيب

الانفصال العاطفي مش قرار سهل سواء كانت كانت العلاقة جواز أو خطوبة أو حتى علاقة عاطفية، حتى لو كنت متأكد إنك بالفعل عايز تنفصل عن شريكتك أو شريكك، فمجرد التفكير في انك هتقول لحد كنت بتحبه أو لسه بتحبه أنك عايز تنهي العلاقة دي بيصعب الموضوع. بس اللي حقيقي ممكن يخلي الموضوع أصعب هو أن الانفصال ده يبقى بمشاكل وتلقيح من كل طرف على الآخر. عشان كده العلاقات اللي بتخلص باحترام متبادل والفركشة بشياكة بتبقى أحسن للطرفين وبتساعدهم يكملوا حياتهم بشكل أفضل، وفي ناس كمان بتتفق أنهم يكملوا أصحاب. طب ازاي نفركش بشياكة؟ هنشوف مع بعض…

طريقة الانفصال عن الحبيب

10 نصائح هتساعدكم تنهوا العلاقة العاطفية بشياكة…

1- اتأكد/ اتأكدي إنك عايز تفركش

قبل ما تتكلمي مع شريكك أو تتكلم مع شريكتك فكّر كويس وقرر مع نفسك الأول إذا كُنت بالفعل عايز تنهي العلاقة دي وتمشي. لأن ساعات كتير بيبقى في مشاكل ممكن نحلها ونكمل، بس أوقات بيبقى لازم تبعد. فلازم تتأكد إن قرارك هو الفركشة مش حل المشاكل.

2- التمهيد للموضوع قبل ما تتكلموا

ماينفعش فجأة حد يقرر أنه يبلغ الطرف التاني إن العلاقة انتهت بينهم، لازم يكون في تمهيد للموضوع. وقبل ما الطرف اللي أخد القرار يصارح الطرف التاني بقراره لازم يفكر الأول هيقوله ازاي وهيقوله ايه، لأن المقابلة دي بتكون يمكن أصعب مقابلة بينهم والتفكير فيها مسبقا أحسن عشان يحصل الانفصال بأفضل طريقة.

3- خليك واضح ومُحدد لكن تحلى بالعاطفة

المواقف دي بتكون صعبة ومُحرجة على الطرفين، عشان كده لازم الكلام يكون محسوب وواضح. شارك الطرف الآخر بتفكيرك وقرارك وخلي كلام بسيط وسهل بدون دخول في أي تفاصيل أو إلقاء اللوم والعتاب عليه، لكن برضو اظهر نوع من أنواع التعاطف والمحبة للفترة اللي عيشتوها مع بعض.

4- اتقابلوا وجها لوجه

ماينفعش تسيب حد برسال على الموبايل، أو بمكالمة تليفون. صحيح أن دي واحدة من أصعب المقابلات في حياتك وبتكون أحيانا كتير ضاغطة وموترة، لكنها أفضل بكتير من أي طريقة تانية. اظهار الاحترام والاهتمام بمشاعر الطرف التاني مهم وبيساعد في تقليل الأثر النفسي للانفصال عليكوا انتوا الاتنين.

5- حدد تفاصيل المقابلة

اختار الوقت المناسب ليك وللطرف التاني برضو، واختار مكان هادي تعرفوا تتكلموا فيه، مافيش مكان متفق عليه أنه مكان مثالي للانفصال، لكن بمعرفتك للشخص ده هتعرف ايه المكان والطريقة المناسبة اللي تقدر تبلغه بيها.

6- تقبل فكرة أن الموضوع مؤلم

الانفصال مش حاجة سهلة وزي ما الموضوع هيكون صعب على شريكِك أو شريكتك فهو هيكون صعب عليك برضو. بس أحيانا بيكون القرار الصح حتى لو كان مؤلم وصعب.

7- خليك مستعد تسمع الطرف التاني

أكيد شريكِك أو شريكتك هيبقى عندهم ردود وتعليقات على كلامك، عشان كده لازم تكون مستعد تسمع وتتفهم اللي هيقوله الطرف التاني ويبقى في نوع من أنواع النقاش الحضاري بينكم عشان توصلوا لنقطة مشتركة تقدروا بعدها تسيبوا بعض بشياكة.

8- استعد لكل ردود الأفعال

مهما كنت تعرف شريكتك أو تعرفي شريكِك، فصعب تتخيل رد فعله على حاجة زي الانفصال، حتى لو كان في مقدمات. فلازم تكون مستعد لكل رد فعل سواء غضب أو تفهم أو نقاش أو محاول لإصلاح الموضوع واستكمال العلاقة مع وعود بعدم تكرار أي مشاكل من اللي وصلتكوا لكده.

9- ماتسيبش الباب مفتوح

لو هتقرر تنهي علاقة لازم تكون واضح بشأن الموضوع ده، ماتسيبش الباب مفتوح أو موارب. حتى لو هتقرروا تبقوا صحاب ف ده ماينفعش يحصل على طول لازم كل واحد ياخد وقته ويتأكد من انتهاء العلاقة من جواه، وبعد كده لو انتوا الاتنين موافقين تفضلوا صحاب ممكن تعملوا ده أكيد.

10- استخدم كلام إيجابي ومافيش تلقيح

حاول ماتخليش المقابلة كلها سلبية أو تبدأوا تتكلموا في تفاصيل المشاكل. صحيح أنها مقابلة بتسيبوا بعض فيها، بس عشان تبقى الفركشة بشياكة ممكن تستخدم كلام إيجابي ومايكونش كدب أكيد، بس ممكن تعبر للطرف التاني عن الحاجات الكويسة اللي هتفتقدها فيه وإن الانفصال مش سهل عليك برضو لكنه قرار لازم يتاخد عشان مصلحتكوا انتوا الاتنين.

وأهم حاجة ماينفعش يكون في تلقيح بالكلام على السوشيال ميديا أو قدام أي أصدقاء مشتركين عشان العلاقة تفضل كويسة حتى بعض الانفصال.

الانفصال عن شخص بنحبه شىء صعب أكيد لكنه ممكن يكون قرار شيك ومتحضر بين اتنين فاهمين ان مش لازم يكون في حد وحش بس الفكرة أن لو مش قادرين تكملوا مبسوطين فالأحسن تبعدوا حتى لو هتتألموا شوية، وعشان كده الفركشة بشياكة بتسهل الموضوع ده.

اقرئي أيضا:

Source: E7kky.com

طريقة الانفصال عن الحبيب

اترك ردّاًإلغاء الرد