Table of Contents
في مسلسلات مهما تتعاد هنفضل نتفرج عليها وكأنها أول مرة، مش بس لأننا اتأثرنا بيها وبقصصها الدرامية، إحنا كمان اتأثرنا بالشخصيات والموسيقى وحتى أغاني المسلسلات دي. ومن الشخصيات اللي مابننسهاش شخصية “رفيع بك العزايزي” في مسلسل الضوء الشارد، اللي اتذاع لأول مرة سنة 1998. وبالرغم من أن المسلسل كان أبطاله كتير وكلهم شخصيات محورية في الأحداث، إلا أن كتير من متابعي المسلسل اتأثروا جدا بشخصية رفيع بك، لأنه شخصية مُركبة وليها جوانب كتير، من أول علاقته بأمه لعلاقته بأخوه ولحد علاقته بفرحة، وإحساسه بالمسئولية تجاه عائلته دايما. وبعد أكتر من 20 سنة على إذاعة المسلسل، أحب أشارككم شوية ملحوظات عن رفيع بك وتحديدا علاقته بفرحة أرملة أخوه، وليس يستحق أنه يكون فتى الأحلام المثالي اللي بندور عليه…
1- راجل مُميز وعنده كاريزما
رفيع بك ماكنش مجرد كبيرة عيلة العزايزة بعد وفاة والده، لأ، ده شاب عنده شخصية ورؤية وبالرغم من أنه ماكملش تعليمه زي أخوه فارس، إلا أنه كان عارف يعني ايه إدارة للأملاك اللي عنده وازاي يمشي الدنيا صح. ده غير أنه ماتبعش سياسية والده العنيفة في الإدارة وقرر أنه يبقى ليه أسلوبه وطريقته.
2- مابيحبش الخيانة ولا الغدر
بالرغم من أن رفيع بك اتجوز نفيسة بالغصب عشان أسباب ليها علاقة بمصلحة العيلة، إلا أنه كان رافض يخونها ويتجوز عليها، حتى بعد مع والدته واجهته بحبه لفرحة وقالتله أنه يقدر يتجوزها على نفيسة، كان متردد. مش بس نفيسة، هو كمان كان خايف أن حبه لأرملة أخوه يبقى خيانة لذكرى أخوه، وده بيدينا انطباع أنه بالرغم من الهيبة والطريقة الرسمية اللي بيتعامل بيها طول الوقت، من جواه إنسان رقيق وبيحس باللي حواليه.
اقرئي أيضا: ليه المفروض مايبقاش عندك ريليشن شيب جولز
3- مواقفه بتعبر عن حبه اللي بيحاول يداريه
رفيع بك كان المعنى الحقيقة لبيت الشعر اللي بيقول “نعم أنا مشتاق وعندي لوعة ولكن مثلي لا يُذاع له سر” لأنه فضل محتفظ بحبه لفرحة، بس في مواقف كتير ماكنش بيقدر يداري حبه. أولهم غيرته عليها ورفضه الشديد أنها تتخطب للدكتور فيصل، وانبساطه برفضها برضو. غيره كده أنه كان ضعيف قدامها ولما بتكلمه في حاجة أو بتطلب منه طلب بيوافق، صحيح كان بيبين دايما أنه مش فارق معاه، لكن من جواه كان بيسمعلها.
4- دفاعه عن فرحة باستمرار
ماحدش كان يقدر يجيب سيرة فرحة بحاجة وحشة قدام رفيع بك، فهذا الشخص الرزين الهادىء كان بينفعل بشدة لو حد غلط في فرحة. ده ظهر في خناقه مع نفيسة لما حاولت تجرح فيها، وظهر برضو في موقفه من ابن عمه صبري لما لمّح بس عدن شكه في أن ابن فرحة يكون ابن فارس. ورغم أنه كان دايما بيحاول يخبي حبه ليها، لكنه كان بيرفض أي إهانة في شخصها.
اقرئي أيضا: ليه مش بننجذب للجود بوي وبنحطه في الفريند زون
5- الاعتراف بالحب سيد الأدلة
آخر مشهد في مسلسل الضوء الشارد كان مفاجأة لكل الناس، لأن أخيرا رفيع بك اعترف لفرحة بحبه ليها. صحيح أن ده ممكن يبقى مشهد عادي، بس مع شخصية زي رفيع بك الل تابعناها 30 حلقة وشوفنا قد ايه هو شخص صعب يصرح بمشاعره، المشهد كان مختلف جدا وليه طعم خاص. كلمة “بحبك يا فرحة” كانت حقيقي مميزة لما طلعت من رفيع بك، الشخص اللي له شأن كبير وصعب جدا كلمة بحبك تطلع من راجل صعيدي له مركزه زي رفيع بك. عشان كده كانت مختلفة وحلوة وليها هيبة زيه برضو.
اقرئي أيضا: ازاي تعبر عن حبك بطرق مختلفة غير كلم بحبك؟
8 حاجات بتخلينا نحترم علاقة الحب بين عبدالمجيد وذات
ليه عبدالغفور وفاطمة ريليشين شيب جولز؟